RuckUp maxfiylik siyosati
Kuchga kirgan sana: 17-oktabr 2026. Oxirgi yangilanish: 28-oktabr 2026.
Ushbu siyosat RuckUp ilovasi qanday shaxsiy ma'lumotlarni yig'ishi, ulardan qanday foydalanishi va himoya qilishini tushuntiradi. Ma'lumotlar O'zbekiston Respublikasining "Shaxsga doir ma'lumotlar to'g'risida"gi qonuniga muvofiq qayta ishlanadi.
1. Qanday ma'lumotlarni yig'amiz
| Ma'lumot | Nima uchun |
|---|---|
| Email, foydalanuvchi nomi, parol (xeshlangan holda) | Akkaunt, kirish kodi yuborish |
| Kirish, ro'yxatdan o'tish yoki parolni tiklash kodi so'ralganda: IP manzil, ilova yoki brauzer turi va vaqt — 30 kun saqlanadi | Akkauntni begona urinishlardan himoya qilish |
| Akkauntingiz ochiq qurilmalar: telefon modeli, operatsion tizim va ilova versiyasi, oxirgi IP manzil va faollik vaqti — qurilmadan chiqqaningizda yoki u 30 kun ishlatilmasa o'chiriladi | "Qurilmalar" bo'limida akkauntingiz qayerda ochiqligini ko'rsatish va begona qurilmani chiqarish |
| Telefon raqami | Akkaunt profili; boshqa o'yinchilarga ko'rsatilmaydi |
| Profil rasmi (ixtiyoriy) | Profil va ro'yxatlarda ko'rsatish |
| Google akkaunti ma'lumotlari (Google orqali kirsangiz): ism, email, rasm | Ro'yxatdan o'tish va kirish |
| Apple ID ma'lumotlari (Apple orqali kirsangiz): ism, email (Apple yashirgan manzil bo'lishi mumkin), Apple foydalanuvchi identifikatori | Ro'yxatdan o'tish va kirish |
| O'yin ma'lumotlari: turnirlar, natijalar, duellar, PTS va XP | Reyting va statistika |
| Chat xabarlari | Xabarlarni yetkazish |
| "Texnik yordam" chati: xabarlaringiz va yuborgan rasmlaringiz (masalan, skrinshotlar) | Savolingizga javob berish, ilovadagi nosozliklarni tuzatish |
| Shikoyat va bloklash: shikoyat sababi, izohingiz, shikoyat qilingan foydalanuvchi bilan oxirgi yozishmalar | Qoidabuzarliklarni ko'rib chiqish va foydalanuvchilarni himoya qilish |
| Joylashuv — faqat PTS duelini boshlash paytida | Klub hududida ekaningizni tekshirish; koordinatalar saqlanmaydi |
| Push bildirishnoma tokeni (Firebase) | Bildirishnoma yuborish |
| Ilova xatolari hisobotlari (Firebase Crashlytics): qurilma modeli, tizim versiyasi, xato tafsilotlari | Ilova yopilib qolish sabablarini topish va tuzatish |
| Online holat va oxirgi faollik vaqti | Do'stlarga online ekaningizni ko'rsatish |
| Saytdagi klub arizasi (ixtiyoriy): klub nomi, shahar, stollar soni, mas'ul shaxs ismi va telefoni | Klubni ulash uchun bog'lanish |
Ma'lumotlar faqat yuqorida ko'rsatilgan maqsadlarda ishlatiladi. Ilovada reklama yo'q va ma'lumotlaringiz asosida reklama profili tuzilmaydi.
2. Kim ko'radi
- Boshqa foydalanuvchilar: foydalanuvchi nomi, rasm, daraja, PTS va o'yin statistikangiz, do'stlar ro'yxati, online holatingiz.
- RuckUp sayti: reytingning birinchi beshligi (foydalanuvchi nomi, status, PTS) va tasdiqlangan klublar (nomi, manzili, stollar soni) saytda ham ko'rsatiladi.
- Email va telefon raqamingiz boshqa foydalanuvchilarga ko'rsatilmaydi.
- Chat xabarini siz yozgan foydalanuvchi ko'radi. Shikoyat yuborsangiz, o'sha foydalanuvchi bilan oxirgi yozishmalaringiz RuckUp jamoasiga ko'rib chiqish uchun beriladi.
- RuckUp jamoasi: "Texnik yordam" yozishmalaringiz va shikoyatlarni — javob berish va ko'rib chiqish uchun.
- Turnir tashkilotchisi bo'lgan klub — ushbu turnirga ro'yxatdan o'tgan o'yinchilar haqidagi ma'lumotlarni.
- Xizmat ko'rsatuvchilar: Google Firebase (push bildirishnomalar va xato hisobotlari), email yuborish xizmati, server hosting provayderi, Telegram (jamoaga yangi murojaat yoki shikoyat haqida xabar berish uchun: foydalanuvchi nomi va xabarning qisqa matni) — faqat Ilova ishlashi uchun.
- Qonunda belgilangan hollarda — vakolatli davlat organlarining (sud, huquqni muhofaza qiluvchi organlar) rasmiy so'roviga binoan.
- Ma'lumotlarni sotmaymiz va reklama maqsadida uchinchi shaxslarga bermaymiz.
3. Saqlash muddati va akkauntni o'chirish
Ma'lumotlar akkaunt faol bo'lgan davrda saqlanadi. Akkauntni o'chirsangiz, u to'liq o'chiriladi: unga kirish darhol yopiladi, profilingiz boshqa foydalanuvchilarga ko'rinmaydi, 30 kun ichida esa barcha shaxsiy ma'lumotlaringiz — ism, email, telefon raqami, rasmlar, chat xabarlari, do'stlar ro'yxati, "Texnik yordam" yozishmalari va bildirishnomalar — serverlarimizdan butunlay o'chiriladi va ularni tiklab bo'lmaydi. Boshqa o'yinchilarning turnir jadvallari buzilmasligi uchun o'tgan o'yin natijalari ismsiz qoladi va sizga bog'lanmaydi.
4. Xavfsizlik
Ma'lumotlar shifrlangan ulanish (HTTPS) orqali uzatiladi, parollar xeshlangan holda saqlanadi, serverga kirish cheklangan. "Texnik yordam"ga yuborilgan rasmlar ochiq bo'lmagan xotirada saqlanadi va faqat himoyalangan havola orqali ochiladi.
5. Huquqlaringiz
Ma'lumotlaringizni ko'rish, tuzatish (Profil → Shaxsiy ma'lumotlar) va o'chirish (Profil → Sozlamalar → "Hisobni o'chirish" yoki ruckup.uz/account-deletion) huquqiga egasiz. Joylashuv va bildirishnoma ruxsatlarini telefon sozlamalarida istalgan vaqtda o'chirishingiz mumkin.
6. Bolalar
RuckUp ilovasi 13 yoshgacha bo'lgan bolalar uchun mo'ljallanmagan.
7. O'zgarishlar va aloqa
Siyosat yangilanganda ilova orqali xabar beramiz. Savollar va so'rovlar uchun: ilovadagi "Texnik yordam" chati yoki shahzodbekalikov@gmail.com.